'मोहंजो दडो'या बहुप्रतिक्षित चित्रपटाच्या शूटिंगसाठी प्रसिद्ध अभिनेता हृतिक रोशन भुजमध्ये दाखल झाला आहे. दिग्दर्शक आशुतोष गोवारीकर यांच्या 'मोहंजो दडो' चित्रपटात मुख्य भूमिका साकारणारा हृतिक याआधी मागील वर्षी प्रदर्शित झालेल्या 'बँग बँग' चित्रपटात दिसला होता. दिग्दर्शक आशुतोष गोवारीकर आणि हृतिक रोशन ही जोडी 'मोहंजो दडो' चित्रपटाद्वारे दुसऱ्यांदा एकत्र येत असून, याआधी 'जोधा अकबर' हा सुपरहीट चित्रपट या दोघांनी एकत्र केला होता. 'जोधा अकबर' चित्रपटात हृतिकने बादशहा अकबरची मुख्य व्यक्तिरेखा साकारली होती. २०१६ मध्ये प्रदर्शित होणाऱ्या 'मोहंजो दडो' चित्रपटाद्वारे अभिनेत्री पूजा हेगडे बॉलिवूडमध्ये पदार्पण करीत आहे. आजपासून या चित्रपटाच्या चित्रिकरणास सुरुवात होत आहे.
